"Prava" düzəltmək üçün pul yığan şəxs tutuldu

Qazax rayonunda dələduzluq edən şəxs saxlanıb. Avtosfer.az-ın "Report"a istinadən məlumatına görə, rayonun Yuxarı Salahlı kənd sakini Musa Cəfərov həmyerlilərini aldadaraq onlardan sürücülük vəsiqəsi düzəltmək adıyla pul alıb. İlkin məlumatlara görə, beş nəfərdən 5 000 manat pul alan M.Cəfərov bir müddət kənddə görünməyib. Aldadıldıqlarını hiss edən vətəndaşlar Qazax Rayon Polis Şöbəsinə müraciət ediblər. Qazax RPŞ-nin əməkdaşları tərəfindən həyata keçirilən əməliyyat-axtarış tədbirləri nəticəsində M.Cəfərov Bakı şəhərində saxlanılıb. Əməlini etiraf edən M.Cəfərov peşman olduğunu bildirib. Faktla bağlı Qazax RPŞ-də araşdırmalara başlanılıb.