Prezident atom sualtı qayığında dənizin dibinə endi - FOTO

Fransa prezidenti Emmanuel Makron nüvə raketinin startını imitasiya edən təlimlərə qatılaraq atom sualtı qayığının göyərtəsində bir neçə saatlıq dənizin dibinə enib.

Avtosfer.az azərtac-a istinadən xəbər verir ki, Fransa prezidenti “Le Terrible” sualtı qayığına helikopter vasitəsi ilə enib və həmin fotoşəkli sosial şəbəkələrdə yerləşdirib.

Xatırladaq ki, Böyük Britaniya 2019-cu ildə Avropa İttifaqını tərk etdikdən sonra Fransa Aİ-yə üzv 27 ölkə arasında nüvə silahına malik yeganə dövlət olacaq.

Təlimlər prezidentin “İle Longue” hərbi dəniz bazasına səfər proqramının bir hissəsidir. Fransanın ballistik nüvə raketi ilə təchiz olunmuş 4 atom sualtı qayığının hamısı məhz burada yerləşir.

Sualtı qayıqlardan əlavə, Fransanın Hərbi Hava Qüvvələri də nüvə silahlarına malikdir. Ümumilikdə ölkənin nüvə arsenalı 300 döyüş başlığından ibarətdir.