Prokuror Bakıda piyadanı vurub qaçan avtobus sürücüsünə ağır cəza istəyib

Bu gün Bakı Ağır Cinayətlər Məhkəməsində ölümlə nəticələnən yol-nəqliyyat hadisəsi törətməkdə təqsirləndirilən Allahqulu Əsədovun cinayət işi üzrə məhkəmə prosesi davam etdirilib. Avtosfer.az-ın APA-ya istinadən xəbərinə görə, hakim Azər Orucovun sədrliyi ilə keçirilən prosesdə dövlət ittihamçısı çıxış edərək, A. Əsədovun cinayətinin məhkəmə istintaqı zamanı da sübuta yetirildiyini deyib. O, A. Əsədovun 9 il müddətinə azadlıqdan məhrum edilməsini istəyib. Məhkəmə prosesi iyunun 14-də davam etdiriləcək. Qeyd edək ki, A. Əsədov ötən il yanvarın 28-də nəqliyyat vasitəsini idarə etmək hüququ olmadan yol hərəkəti qaydalarını pozaraq, "İkarus-256" markalı, 90-RS-434 dövlət qeydiyyat nişanlı avtobusla Badamdar şosesində hərəkətdə olarkən piyada İsrafil Xankişiyevi vurub və onun üstündən keçib. A. Əsədov xəsarət alana yardım göstərmədən piyadanı vurduqdan hadisə yerini tərk edib. İ. Xankişiyev hadisə yerində dünyasını dəyişib.