Qar Bakıda yoları bu hala saldı - VİDEO

Avtomobili  sürətlə idarə edən sürücülər qəfildən yollarını ya sağa, ya da sola dəyişirlər. Səbəb isə sürücülərin gözləmədikləri halda yolda qarşılaşdıqları çuxurlardır. Görüntülər paytaxtın Nəsimi rayonu Asif Məhərrəmov küçəsindəndir. Sürücülərin sözlərinə görə, bir neçə gün əvvəl yağan qardan sonra yolun bir neçə hissəsində asfalt qatı dağılıb, iri çuxurlar əmələ gəlib.

Bənzər vəziyyət Yasamal rayonu Məhəmməd Xiyabani küçəsində də hökm sürür. Burada da qardan sonra yolun xüsusən də hərəkət hissəsində çalalar əmələ gəlib. 3-4 kilometrlik yolda demək olar ki, addımbaşı çuxur var. Bir çoxu da su ilə dolu olduğundan sürücülər xəbərsiz halda avtomobili həmin çuxura salmaqla yolu keçirlər. Bu da təbii ki, avtomobilə böyük ziyan vurur. 

Ən acınacaqlı vəziyyət isə Abşeron rayonu Xırdalan şəhərində Heydər Əliyev prospektində yaşanır. Prospektin bir neçə yerində yaranan çuxurlar sürücüləri pis vəziyyətə salıb. Bir çox sürücü avtomobilini çuxura salmamaq üçün əks yola çıxır. Bu da qəza şəraiti yaradır. 

Əlacsız qalan sakinlər öz vəsaitləri hesabına ağır texnikanın vasitəsi ilə yaxınlıqdakı təpələrdən torpaq və daş yığaraq çuxurları doldurmağa başlayıblar. Onlar bunu hər il qar yağandan sonra təkrar etdiklərini deyirlər. 

''Azəravtoyol'' ASC-nin mətbuat katibi Anar Nəcəfli bildirdi ki, məsələdən xəbərdardırlar. İki gündür ki, idarənin əməkdaşları asfalt qatı dağılmış yolları siyahıya alaraq təmir etməyə başlayıblar.