Qarabağda qan axır, bunların dərdinə bax: "Mercedes", məktub... - FOTO

Son vaxtlar Ermənistan mətbuatında iki əsas məsələ müzakirə edilir. Avtosfer.az trend-ə istinadən xəbər verir ki, bunlardan birincisi, müdafiə nazirinin müavininin hərbi texnika çatışmazlığı və ordudakı mövcud problemlər barədə məktubudur. İkincisi isə, nazir müavininin bu məktubu fonunda Müdafiə Nazirliyinin onlarla bahalı avtomobili, "Mercedes Benz - CLS-500" markalı avtomobilləri alması ilə bağlı xəbərdir. Belə avtomobillərin, digər "lüks" avtomobillərin birinin qiyməti 71 min avrodur. Ermənistan ictimaiyyəti Qarabağ cəbhəsində vəziyyətin həddən artıq gərginləşdiyi bir vaxtda bu hadisələri ciddi hiddət və qəzəblə qarşılayıb. Bu hadisələrdən sonra Silahlı Qüvvələrin Baş Qərargah rəisi Yuri Xaçaturyan parlamentə çağırıldı. Deputatlar ondan sadalanan məsələlərlə bağlı cavab verməyi tələb etdilər.

Parlamentdə, həmçinin vəzifəsindən azad edilmiş müdafiə nazirinin müavini Alik Mirzabekyanın Müdafiə Nazirliyinin 11.04.2016-cı il tarixli "Ordunun hərbi texnikasının acınacaqlı vəziyyəti barədə" məktub-məruzəsi müzakirə edilib. Parlamentarilər belə nəticəyə gəliblər ki, məruzə nazirlikdə tam öyrənilməyib və araşdırılmayıb, bunun nəticəsi isə Dağlıq Qarabağda uğursuzluq və çoxsaylı hərbi itkilərdir.