Qarlı hava Bakı avtovağzalının işinə təsir etməyib

Bakı Beynəlxalq Avtovağzal Kompleksi (BBAK) Azərbaycan ərazisində müşahidə edilən qarlı hava şəraitində sərnişinlərin bölgələrə çatdırılmasında çətinlik çəkməyib. Avtosfer.az xəbər verir ki, bu barədə BBAK-ın növbə rəisi Məhəmməd Abdullayev bildirib. Onun sözlərinə görə, hava şəraiti ilə əlaqədar heç bir avtobus reysi təxirə salınmayıb: "Lakin əvvəlki günlərlə müqayisədə sərnişinlərin sayı azalıb. Avtobus reysləri qrafik üzrə yerinə yetirilir. BBAK təhlükəsizlik tədbirləri ilə əlaqədar son reyslərini saat 18:00-da reallaşdırır".

M.Abdullayev təhlükəsiz tədbirləri çərçivəsində avtobus sürücülərinin də təlimatlandırıldıqlarını qeyd edib.

Xatırladaq ki, hava şəraiti ilə əlaqədar təhlükəsizlik nəzərə alınaraq BBAK-dan ölkənin şimal-qərb hissəsinə yerinə yetirilən avtobus reyslərinin marşrutuna dəyişiklik edilib. Avtobuslar Ağsu aşırımından keçmir. Nəqliyyat vasitələri Bakı-Ələt-Qazax-Gürcüstan sərhədi avtomobil yolunun Kürdəmir hissəsi ilə hərəkət edir.