Rusiya azərbaycanlılarla birgə itən gəminin axtarışını dayandırıldı

Yapon dənizində 20 nəfər heyət üzvi ilə itkin düşən "Vostok" gəmisinin axtarışı dayandırılıb. İstiPress-in Rusiya mətbuatına istinadla verdiyi məlumata görə, bu barədə "Vladivostok” dəniz xilasedici mərkəzinin nümayəndəsi bildirib. Bir müddət öncə axtarışların aktiv fazası dayandırılmışdı. "Yaxınlıqdan keçən gəmilərlə axtarış dayandırılıb. Onlar "Vostok"u 9 gün axtarıblar. Nə insanlar, nə gəmi, nə də onların hər hansı əşyası tapılmayıb", deyə "RİA Novosti"nin mənbəsi bildirib.  Xatırladaq ki, adıçəkilən balıqçı gəmisi yanvarın 25-də Yapon dənizində qəza siqnalı verdikdən sonra itib. Gəmidə 20 nəfər olub. Onların arasında iki azərbaycanlı da var idi - 1972-ci il təvəllüdlü dənizçi Mübariz Hüseynov və 1991-ci il təvəllüdlü dənizçi Ruslan Əlizadə. Gəminin məxsus olduğu "DV-flot" şirkəti heyət üzvlərinin qohumlarına 1,5 milyon rubl məbləğində (təqribən 27 min dollar) yardım edəcək. Bu barədə şirkətin baş direktoru Stanislav Malçevski məlumata verib. Bundan başqa onlara sığorta ödənişləri də olacaq.