"Safastore" dən açıqlama: "Hadisələrin təşkilatçıları Azadxan Xanməmmədov, Faidə Sadıqova və Rasət Miriyevdir"

Dünən Binəqədi rayonunda yerləşən “Safastore” mağazasının önündə “Riyad” Mühafizə Xidmətinin əməkdaşları ilə marketin işçiləri arasında qarşıdurmadan sonra bir neçə şəxs polis tərəfindən saxlanıldı. Onlardan biri də mağazanın yerləşdiyi obyektin sahibi Azadxan Xanməmmədov olub. A.Xanməmmədovun vəkili Ceyhun Yusifov “Qafqazinfo”ya açıqlamasında bildirib ki, baş verən hadisənin müdafiə etdiyi şəxsə birbaşa aidyyatı yoxdur: “Həmin obyekt Azadxan müəllimin mülkiyyətindədir, qarşı tərəf isə sahiblik hüququmuzu həyata keçirməyə maneəlik törədir. Buna görə də qanunverciliyə uyğun olaraq “Riyad” Mühafizə Xidməti ilə müqavilə imzalamışıq. Bundan sonra “Riyad” Mühafizə Ximdəti ilə icra haqqını ödəməsə də, həmin yerdə fəaliyyət göstərən Faiq adlı şəxsin arasındakı mübahisədə iştirak etməmişik. Ümumiyyətlə, orada baş verənlərin şahidi olmamışıq, görməmişik. Mübahisə baş verən zaman əməkdaşlardan biri Azadxan müəllimə telefonla məlumat verəndə o, Nizami rayonu ərazisində olub. Hadisənin necə baş verməsi haqda bizdə heç bir məlumat yoxdur. “Riyad” Mühafizə Xidməti fəaliyyətini özü tənzimləyir. Bizim işimiz müqavilə imzalamaqdır. Müqavilə də obyektin mühafizəsinin təmin edilməsi məqsədi ilə bağlanılıb. Mühafizə Xidmətinin əməkdaşları kənar şəxslərin obyektə qanunsuz daxil olmasının qarşısını alıblar. Bu da qanunvericiliyə tam uyğundur”. 

C.Yusifov qeyd edib ki, A.Xanməmmədov barəsində Cinayət Məcəlləsinin 221.2-ci (xuliqanlıq) maddəsi ilə cinayət işi başladılıb: “Azadxan müəllim cinayət işinə təqsirləndirilən şəxs qismində cəlb edilib, istintaq davam etdirilir. Hazırda polisin nəzarətindədir, onun barəsində həbs-qətimkan tədbirinin seçilməsi barədə təqdimat veriləcək. İstintaq tərəflər arasındakı münaqişəni aydınlaşdırmaq əvəzinə, məsələni elə bir formaya gətiriblər ki, guya Azadxan müəllimin göstərişi ilə olub. Bu, tamamilə absurddur. Həmin obyektlə bağlı qarşı tərəfin əlində rəsmi sənəd varsa, onu təqdim etsinlər. İnamdan həmin sahəni icrayə götürmək məqsədi ilə münasibət qurulubsa, bu gün həmin münasibətdən irəli gələn halı qanunvercilik tənzimləməlidir. Həmin obyektin Azadxan Xanməmmədovun xüsusi mülkiyyəti olması barədə 19.05.2011-ci il tarixli çıxarış var”.

"Safastore"-dan Avtosfer.az-a verilən açıqlamada vəkilin mətbuata verdiyi fikirlər təkzib edilir.

"İş adamı Azadxan Xanməmmədovun vəkili Ceyhun Yusifov mətbuata yalan və reallığı əks etdirməyən açıqlama verməklə  ictimaiyyəti çaşdırmağa çalışır. Dünənki hadisələrin təşkilatçıları olaraq Azadxan Xanməmmədov, Faidə Sadıqova və Rasət Miriyev olub. Belə ki, bizdə olan məlumata görə A.Xanməmmədovun təşkilatçılığı ilə Faidə Sadıqova tərəfindən qoçu dəstəsinə 22 000 manat məbləğində pul ödənilmişdir. Görüntülərdən göründüyü kimi A. Xanməmmədov 08 iyun 2017-ci il tarixdə səhər saat 05.56 radələrində özünə məxsus 10 LL 272  dövlət nömrə nişanlı Lexus markalı maşını ilə, Riyad MX-nin əməkdaşlarının müşayəti ilə əraziyə gəlir. Görüntülərdən göründüyü kimi təşkilatçılar və icraçılar fəaliyyətə keçmədən öncə müzakirələr aparırlar. Digər görüntülərdən göründüyü kimi A.Xanməmmədov qolu zorbalı qoçu dəstəsini başına yığaraq onlara təlimat verir və bunu da açıq aydın görmək mümkündür. Hadisələrin gərginləşdiyini görən A.Xanməmmədov şəxsi maşınında qaçmağa çalışır, lakin market əməkdaşları tərəfindən maşının qarşısı kəsilir. 

Bir daha qeyd edirik ki, həmin əmlak 2014-cü ildə mövcud sahibi tərəfindən A.Xanməmmədova böyük həcmdə vəsait ödənməklə alınıb".

Qeyd edək ki, iyunun 8-də səhər saatlarında "Riyad" Mühafizə Xidmətinin 20-yə yaxın əməkdaşı Binəqədi rayonu, Mir Cəlal küç 1 d ünvanında yerləşən “Safastore” mağazasına hücum edərək əməkdaşları zor gücünə çölə çıxarıblar. Saytımıza müraciət edən mağaza əməkdaşları mMühafizəçilərin mağazanın keçmiş sahibi, iş adamı Xanməmmədov Azadxan Allahqulu oğlunun iştirakı və tapşırığı ilə hücum etdiyi iddia ediblər. Mağazadan verilən xəbərdə bildirilirdi ki, il yarım əvvəl A. Xanməmmədov mağazanı 1.5 milyon manata yeni sahibinə satıb. Amma bu günə qədər sənədləri rəsmiləşdirməyib. Əvvəlki sahib isə pulu geri qaytarmadan mağazanın boşaldılmasını və geri təhvil verilməsini tələb edib. Hadisədən sonra Daxili İşlər Nazirliyi məlumat yayaraq faktla bağlı Binəqədi rayon Polis İdarəsinin istintaq şöbəsində Cinayət Məcəlləsinin 221.2.1-ci (xuliqanlıq – bir qrup şəxs tərəfindən törədildikdə) və 221.2.2-ci (xuliqanlıq - ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə törədildikdə) maddələri ilə cinayət işi başlanıldığını və 13 nəfər saxlanıldığını açıqlayıb.