Sakinlər Bakı-Sumqayıt yolunu bağladılar - FOTO

Xocəsən qəsəbəsi, Motodrom yaşayış massivinin sakinləri onlara ödənilən kompensasiya ilə razılaşmadıqları üçün bu gün səhər Bakı-Sumqayıt yolunu bağlayıblar.

Avtosfer.az “qafqazinfo”ya istinadən xəbər verir ki, sakinlər yaşadığı mənzillərin “Avtovağzal” metro stansiyasının yaxınlığındakı depo tuneli qazılan zaman dağıldığını bildirir:

“Avqustun 15-də bizim və bizim kimi bir neçə qonşunun evi bərbad vəziyyətə düşüb. Metropoliten əməkdaşları evləri boşaltdı, bizi kirayə mənzillərə çıxartdı, tezliklə köçürüləcəyimizi dedilər. İndi bir neçə gündür ki, İcra nümayəndəliyindən gələn şəxslər evin kvadratmetrinin 500 manatdan hesablanacağını deyir”.

Hazırda hadisə yerinə polis əməkdaşları gəlib.

***

“Bakı Metropoliteni” QSC-nin mətbuat xidmətinin rəhbəri Nəsimi Paşayev məsələylə bağlı açıqlama verib. Onun sözlərinə görə, Metropoliten hazırda heç bir köçürülmə və yaxud kompensasiya işini icra etmir. Problemlə aidiyyatı qurumlar məşğul olub və olacaq.