Saray körpüsü sabah açılır: Sürücülər narazıdır - VİDEO

Sumqayıtla Abşeronu birləşdirən Saray körpüsü sabah sürücülərin istifadəsinə veriləcək. Bu barədə Avtosfer.az-a Sumqayıt şəhər İcra Hakimiyyətindən məlumat verilib.

Bildirilib ki, üç aşırımdan ibarət olan yeni körpünün uzunluğu 104 metr, ümumi eni isə 21,6 metr təşkil edir.

Körpüdə tikinti işləri tam yekunlaşıb.  Dörd hərəkət zolaqlı olmaqla inşa edilən körpünün hər iki tərəfində piyadaların rahat hərəkəti üçün 2 metr enində səkilər də nəzərdə tutulub. Yol asvaltlanıb, xəttlər çəkilib.

Sabah saat 11:00-dan sürücülər Saray körpüsündən tam istifadə edə biləcək.

***

Abşeronla Sumqayıtı birləşdirən Saray körpüsündə tikinti işləri yekunlaşmaq üzrədir.

Avtosfer.az-ın məlumatına görə, dörd hərəkət zolaqlı olmaqla inşa edilən körpünün hər iki tərəfində piyadaların rahat hərəkəti üçün 2 metr enində səkilər də nəzərdə tutulub.

Yol asfaltlanıb, xətlər çəkilib, amma avtomobil yolu körpüyə uyğunlaşdırılmayıb. Məhz bu səbəbdən həmin ərazidə tıxac və qəzalar qaçılmaz olacaq.

Sakinlərin sözlərinə görə, bütün bunlara səbəb Saray istiqamətində yolun üzərində iaşə obyektlərinin olmasıdır.

Avtomobil Yolları Dövlət Agentliyindən bildirilib ki, körpüdə tikinti işləri layihəyə tam uyğun aparılıb. Ancaq yolun genişləndirilməsi onların səlahiyyətində deyil.

Sumqayıt Şəhər İcra Hakimiyyətindən isə bildirilib ki, körpü istifadəyə verildikdən sonra yolda genişləndirmə işləri aparılacaq, piyadaların və nəqliyyatın hərəkətinin rahatlığını təmin etmək məqsədilə əvvəlki yol infrastrukturu körpüyə uyğunlaşdırılacaq.

“Bununla bağlı qərara alınıb ki, yaxın günlərdə Məhəmməd Əsədov küçəsinin genişləndirilməsi ilə bağlı yeni layihə hazırlansın və icrasına başlanılsın”, - deyə icra hakimiyyətindən bildirilib.

Ətraflı videomaterialda.