Sel yolları yuyub apardı – İsmayıllıda

Ötən gün İsmayıllı rayonunda baş vermiş təbii fəlakət nəticəsində avtomobil yollarına dəymiş ziyan aradan qaldırılır. Avtosfer.az xəbər verir ki, bunu "Azəravtoyol" ASC-nin mətbuat xidmətinin rəhbəri Anar Nəcəfli bildirib. Onun sözlərinə görə, Qaraməryəm-İsmayıllı-Şəki avtomobil yolunun hərəkət hissəsinə təbii fəlakət nəticəsində hər-hansı bir ziyan dəyməyib və avtonəqliyyat vasitələrinin hərəkətində hər-hansı bir ciddi problem müşayiət olunmayıb: "Sözügedən yolun müəyyən hissələrində çiyin hissələr (yol kənarlarında torpaq-çınqıl hissə) güclü su axını nəticəsində yuyulub. Hazırda çiyinlərin bərpası istiqamətində işlər aparılır.

Bundan başqa güclü sel nəticəsində 5 kənd yolunda suötürücü borular və su keçidləri dağılıb. Həmin ərazilərdə də bərpa işləri davam etdirilir, insanların rahat gediş-gəlişini təmin etmək üçün müvəqqəti yol hissələri salınır".

Qeyd edək ki, iyunun 12-də İsmayıllı rayonuna yağan güclü leysan yağışı nəticəsində yaranan sel suları kəndlərə ciddi ziyan vurub, iki nəfər ciddi xəsarət alıb. Belə ki, Çayqovuşan kənd sakini, 12 yaşlı Sadıqova Səbinə Samir qızını sel aparıb, amma sonradan onu xilas etmək mümkün olub. Quşencə kənd sakini, 78 yaşlı Mustafayeva Maya Muradxan qızı isə yaşadığı evin uçması nəticəsində dağıntılar altında qalıb. Hazırda hər iki şəxs İsmayıllı Rayon Mərkəzi Xəstəxanasında müalicə olunurlar.