Sərnişinlərin diqqətinə! - Bu avtobus marşrutu ləğv edildi

Yol verdiyi qayda pozuntuları və mütəmadi nöqsanlara görə Bakıda avtobus marşrutlarından birinin fəaliyyəti dayandırılıb. Bakı Nəqliyyat Agentliyinin (BNA) Nəqliyyatı İntellektual İdarəetmə Mərkəzindən (NİİM) Avtosfer.az-a verilən məlumata görə, marşrut xətlərində sürücülər tərəfindən "Avtomobil nəqliyyatı ilə sərnişin və baqaj daşınması Qaydaları"nın ciddi şəkildə pozulması hallarına son qoyulması ilə əlaqədar, mütəmadi olaraq marşrut xətlərinin müvəqqəti istifadəçilərinə xəbərdarlıqlar edilməsinə baxmayaraq qayda pozuntuları hələ də təkrarlanır.

Son zamanlar 63 saylı marşrut xətti üzrə hərəkət edən avtobuslarla bağlı xeyli sayda qayda pozuntuları aşkarlanıb. Belə ki, cari ilin fevral ayının 28-də 63 saylı marşrut xətti üzrə hərəkət edən sərnişin avtobusu 2 piyadanı vurub və nəticədə 1 piyada vəfat edib: "Qeyd edilən marşrutda fəaliyyət göstərən avtobusların istismara yararsız və qəzalı vəziyyətdə olması, dəfələrlə qayda pozuntularına yol verməsi, o cümlədən mövcud marşrut xəttini dəyişməsi halları sərnişindaşıma xidmətinə mənfi təsir göstərdiyi üçün Bakı Nəqliyyat Agentliyi tərəfindən 63 saylı marşrut xəttinin fəaliyyəti 01 aprel 2016-cı il tarixindən etibarən dayandırılacaq".

Bundan əlavə, Bakı Nəqliyyat Agentliyinin marşrut xətlərində apardığı təkmilləşdirmə işlərinin davamı olaraq 3 saylı marşrut xəttində də dəyişikliklər edilib: "Belə ki, "BakuBus" MMC-yə məxsus 3 saylı marşrut xətti 01 aprel 2016-cı il tarixindən etibarən "Şəhidlər Xiyabanı" - Badamdar şossesi - Mikayıl Müşfiq küçəsi və Hüseyn Cavid prospektindən keçməklə hərəkətini davam etdirəcək".

Elmin