Silahlıları daşıyan ikinci avtobus karvanı Hələbi tərk edib

Silahlıları və onların ailələrini daşıyan ikinci avtobus karvanı Suriyanın Hələb şəhərini tərk edib. Avtosfer.az apa-ya istinadən xəbər verir ki, avtobus və təcili yardım maşınlarından ibarət karvan silahlıları və onların ailələrini marşrutun son nöqtəsi olan Ər-Rəşiddin rayonuna çatdırıb. Burada onlar nəqliyyat vasitəsini dəyişərək, İdlib əyalətinə yola düşüb.

Avtomobil karvanı rusiyalı hərbçilər və Qırmızı Xaç Beynəlxalq Komitə əməkdaşları tərəfindən  müşayiət edilib. Silahlıları Ər-Rəşiddinə çatdıran avtobuslar və təcili yardım maşınları növbəti reys üçün Hələbə qayıdıb.

Qeyd edək ki, radikal qruplaşmaların sağ qalan üzvlərinin Hələbin şərq rayonlarından çıxarılması əməliyyatı rusiyalı hərbçilər və Suriya hökuməti tərəfindən koordinasiya edilir.   

Şəhəri tərk etməyə razılaşan silahlılara təhlükəsizlik zəmanəti verilib.