Sürücülərin nəzərinə - Bu küçələrdən keçməyin

Bakının İstiqlaliyyət küçəsində, metronun "İçərişəhər" stansiyasının qarşısında aparılan təmir işləri nəhayət ki, dünən günortadan sonra yekunlaşıb. Qeyd edək ki, bu küçədə təmir işlərinin cəmi 2 gün aparılacağı bildirilsə də, vədə əməl edilmədi və işlər 8 günə yekunlaşdı.

Lakin indi də İstiqlaliyyət küçəsinə bitişik digər yolda təmir işlərinə başlanılıb.

Avtosfer.az xəbər verir ki, bu barədə NİİM-dən verilən məlumata görə, Əziz Əliyev küçəsinin Azərbaycan prospekti ilə kəsişməsindən İçərişəhərin Qoşa Qala qapıları ərazisinə qədər olan hissəsində təmir işlərinin aparılması ilə əlaqədar yolda nəqliyyat vasitələrinin hərəkəti məhdudlaşdırılıb.

Qeyd edək ki, artıq bir neçə gündür ki, Heydər Əliyev prospektindən metronun "Koroğlu" stansiyası istiqamətində Keşlə qəsəbəsindən keçən yol Davud Aslan küçəsi ilə kəsişmədə bağlıdır. Bundan əlavə, Ceyhun Səlimov küçəsi də ərazidə yeni metro stansiyasının tikintisi ilə əlaqədar Hərbi hospitalın qarşısından 3-cü mkr dairəsi istiqamətində uzun müddətə bağlanıb.