Tanınmış idmançılarımız oteldən qovuldu - Qızlara sataşıblar

Türkiyənin Antalya şəhərinə yollanan bir qrup azərbaycanlı dincəlmək istədikləri "Sirene Belek” otelindən qovulublar. Avtosfer.az xəbər verir ki, bu barədə yenicag.az-a sözügedən məkanda hadisənin şahidi olan turist xəbər verib. Onun sözlərinə görə, qovulanlar arasında bir sıra idmançılar da var. Qovulanlar arasında MMA döyüş növü ilə məşğul olan Gündüz Nəbiyev, universal döyüş növü üzrə dünya çempionu Sənan Dünyamalıyev, kikboksçu Orxan Məlikov, qarışıq döyüş növləri üzrə dünya çempionu Etiqat Atakişiyev və güləşçi Turxan Qurbanov da olub. Ümumilikdə, 15 nəfərdən ibarət olan qrupa Şəmkir rayon İcra Hakimiyyətinin məsul işçilərindən birinin oğlunun rəhbərlik etdiyi deyilir.

Turxan Qurbanov

Həmin şəxslərin oteldən qovulmasına gəlincə, buna onların otel ərazisində özlərini ədəbsiz aparmaları səbəb olub. Bu ədəbsizliyə hovuz kənarında dincələn turistləri suya tullamaq, "Sirene”nın barında qadınlara sataşmaq və s. kimi davranışlar daxildir. Ailəvi istirahət məkanı olan "Sirene Belek”-də idmançılarımızın özlərini son dərəcədə "sərbəst” aparmaları otel sakinlərindən tutmuş heyətə kimi hamının canını boğazına yığıb. İki gündə çoxsaylı şikayətə səbəb olduqlarından rəhbərlik azərbaycanlıların istirahətini yarımçıq kəsərək, qrupu qapının ağzında qoyub.

Məlumatı Antalyanın Belek bölgəsində yerləşən "Sirene Belek” otelindən də təsdiqləyiblər: "Bəli, belə bir hadisə baş verib. Buna görə də çox məyusuq. Nəticədə məcbur qalıb, həmin şəxsləri oteldən uzaqlaşdırdıq. Buna səbəb isə qeyd etdiyiniz qonaqların uyğunsuz hərəkətləridir. Xüsusən də hovuz başında, ailələrin olduğu yerlərdə içkili halda turistlərə sataşıblar”, deyə otel nümayəndəsi bildirib.

Maraq üçün qeyd edək ki, ədəbsiz davranışları ilə diqqət çəkən şəxslər arasında olan Sənan Dünyamalıyev 2010-cu ildə Bakı Ağır Cinayətlər Məhkəməsində Cinayət Məcəlləsinin 221-ci (xuliqanlıq) maddəsi ilə mühakimə olunub. İttiham olunan şəxsə şərti cəza təyin edilib və o, məhkəmə zalından azadlığa buraxılıb. Lakin bundan 5 il sonra S.Dünyamalıyev "Kral” şadlıq sarayının yaxınlığında baş verən "razborka” ilə gündəmə gəlib. O, həmin vaxt "Neftçi” təlim-məşq mərkəzində tələbələri ilə məşq edən Şəhriyar Abbasova mane olublar. Sonuncu iradını bildirdikdə, Sənan Dünyamalıyev Şəhriyar Abbasovu "Kral” şadlıq sarayının qarşısına "razborka”ya çağırıb.

Sənan Dünyamalıyev

"Söhbət” zamanı Sənan Dünyamalıyev gəldikləri avtomobildən "Vinçester” tipli tüfəngi götürərək, havaya atəş açıb. Mübahisənin davamında isə Şəhriyar Abbasovun tələbəsi Ramil Vəliyevə sağ bud nahiyəsindən bıçaqla xəsarət yetirilib. Sənan Dünyamalıyev daha sonra könüllü olaraq, Nərimanov Rayon Polis İdarəsinin 16-cı bölməsinə gəlib və hadisə zamanı istifadə etdiyi ov tüfəngini təhvil verib.

O, Cinayət Məcəlləsinin 221.3-cü (xuliqanlıq) və 127.2.3-cü (ümumi təhlükəli üsulla və ya xuliqanlıq niyyəti ilə sağlamlığa az ağır zərər vurma) maddələri ilə ittiham edilib.

Törətdiyi cinayət əməlinə görə Sənan Dünyamalıyev 1 il 5 ay 15 gün müddətinə azadlıqdan məhrum edilib.