Təhlükə anında bir düymə ilə polis çağırışı - Bu cür tətbiq yaradılacaq? – AÇIQLAMA

Son vaxtlar Azərbaycanda ailə-məişət zəminində və xüsusilə, məktəblərdə törədilən cinayətlərin sayı artıb. Xüsusən qadınlara qarşı zorakılığın qarşısının alınması haqqında qanunvericiliyin pozulması haldan asılı olaraq inzibati və ya cinayət tərkibi yaradır. Bu cinayətlərin səbəbləri müxtəlif olsa da, hər birinin bir ortaq cəhəti var: təhlükə anında çarəsiz qalan insanlar.

Dünya praktikasında belə hallar üçün hüquq-mühafizə orqanlarına sürətli şəkildə təhlükə siqnalı göndərən tətbiqlər inkişaf etdirilib. Məsələn, Türkiyədə istifadədə olan “KADES” (Kadın Destek Uygulaması) qadınların və uşaqların təhlükə anında bir düymə ilə polisə yer məlumatı göndərməsinə imkan verən rəsmi mobil tətbiqidir. Həmçinin, Balkan ölkələrində də oxşar funksiyanı yerinə yetirən “Be Safe” tətbiqləri fəaliyyət göstərir. Bu tətbiqlər istifadəçilərə real vaxtda təhlükə siqnalı göndərmək, yaxın polis bölmələri və fövqəladə xidmətlərlə əlaqə qurmaq imkanı yaradır.

Bəs Azərbaycanda cinayət hallarına qarşı bu cür operativ təhlükəsizlik siqnalı göndərən mobil tətbiq yaradıla bilərmi?

Avtosfer.az xəbər verir ki, mövzu ilə bağlı DİN-in Mətbuat Xidmətinin əməkdaşı polis leytenantı Lumu İsrəfilli açıqlamasında bildirib ki, polis əməkdaşları tərəfindən ailə münaqişəsi, həmçinin məişət zorakılığı ilə bağlı daxil olan hər bir müraciətin araşdırılmasına xüsusi həssaslıqla yanaşılır:

“Nazirliyin “102” Xidməti–Zəng Mərkəzi, elektron poçt ünvanı, “Qaynar xətt” kimi operativ sistemlər, “E-polis” mobil tətbiqi və DİN-in sosial şəbəkə hesabları bu qəbildən olan cinayətlərin vaxtında qarşısının alınmasına, zorakılıq etmiş şəxslərə qarşı təxirəsalınmadan adekvat tədbirlərin görülməsinə xidmət edir. Nazirlik tərəfindən ailə-məişət zəminində zorakılıq hallarına qarşı fəaliyyətin məqsədyönlü təşkili, o cümlədən işin aidiyyəti dövlət qurumları, beynəlxalq və qeyri-hökumət təşkilatları ilə koordinasiyalı qurulması, ictimaiyyətlə polis orqanları arasında əlaqələrin möhkəmləndirilməsi, davamlı məlumat mübadiləsinin aparılması daim diqqətdə saxlanılır. Gender əsaslı zorakılıqla mübarizə sahəsində maarifləndirmə işi çərçivəsində ərazi polis orqanları tərəfindən xüsusilə orta və ali təhsil müəssisələrində görüşlər təşkil olunur”.

Açıqlamada həmçinin bildirilib ki, zorakılıq halları yalnız bir ailə üçün deyil, bütövlükdə cəmiyyət üçün təhlükəlidir.

Bu, təkcə ona məruz qalan şəxsin problemi yox, belə hala şahidlik edən hər bir vətəndaşın məsuliyyəti, vicdani borcudur:

“Təhlükəsiz cəmiyyət və sağlam gələcək üçün hər bir vətəndaşa çağırış edərək bildiririk ki, zorakılığa qarşı qəti mövqe nümayiş etdirərək belə hallarla üzləşdikdə və ya rastlaşdıqda dərhal polisə məlumat versinlər”(Bizim.Media).