Tonlarla su israf olunur: Paytaxtda 50 qəpiklik avtoyuma xidmətləri araşdırıldı - VİDEO

Paytaxtda demək olar ki, hər addımbaşı 50 qəpiklik avtoyuma məntəqələrinə rast gəlmək mümkündür.

50 qəpik ödəyirsən və avtomobilini özün yuyursan. Bəs həqiqətən bir avtomobilin yuyulması 50 qəpiyə başa gəlir?

Ümumiyyətlə, bu cür avtoyuma məntəqələrində hər gün tonlarla su sərf olunur. Səhərdən axşama qədər yüzlərlə avtomobil yuyulur və nəticədə xeyli miqdarda su istifadə edilir. Bəs obyekt sahibləri bu suyu necə əldə edirlər?

Baku TV məsələ ilə bağlı paytaxt ərazisində fəaliyyət göstərən bir neçə avtoyuma məntəqəsində olub. Su qıtlığı təhlükəsinin müzakirə edildiyi bir dövrdə bu obyektlərdə nə qədər su sərf edildiyi, istifadə olunan suyun texniki, yoxsa içməli su olduğu araşdırılıb.

Obyekt sahibləri şifahi olaraq bildiriblər ki, hər ay suya görə təxminən 1 000-1 500 manat civarında ödəniş edirlər. Adı 50 qəpiklik avtoyuma olsa da, avtomobilin tam yuyulması faktiki olaraq 50 qəpiyə başa gəlmir.

Vətəndaşlar isə bildirirlər ki, 50 qəpik atanda cəmi 30 saniyə işləyir: "Bir maşını yumaq üçün təxminən 5 manat sərf olunur".

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, qurumun balansında ayrıca texniki su mövcud deyil. Mövcud olan su çirkab və içməli sudur. Avtoyuma məntəqələrinə verilən su da əhaliyə təqdim edilən içməli su ilə eynidir.