Türkiyə Rusiya tırları üçün viza rejimi tətbiq etdi

Türkiyə sərhədini keçən Rusiya tırları bu gündən etibarən mütləq qaydada viza almalıdır. Avtosfer.az modern.az-a istinadən bildirir ki, bunu Türkiyənin Beynəlxalq Nəqliyyatçılar Assosiasiyasından deyiblər. "Uzun müddət ərzində Türkiyə Rusiya tırları üçün viza rejimi tətbiq etmirdi. Lakin Rusiya tərəfindən türk malları üçün sərhəddə nəzarət qaydaları gücləndirildikdən sonra iyun ayının 1-dən belə bir tədbirə əl atılıb. Buna baxmayaraq, biz Rusiya təyyarəsinin vurulmasına qədərki dövrdə mövcud olmuş yüngülləşdirilmiş viza rejiminə keçidə ümid edirik", - Assosiasiyanın nümayəndəsi belə deyib.  

O xatırladıb ki, cari ilin əvvəlində Rusiya birtərəfli qaydada viza rejimini tətbiq edib. Bu tətbiqetmə Türkiyə tırlarına da şamil olunub. Həmin səbəbdən tırlar alternativ Xəzər marşrutundan istifadə edir.  

Türkiyə XİN məsələ ilə bağlı mövqeyini bildirməyib.