Vəkil: "Fədayə Laçın peşmandır"

Vəkil Türkel Süleymanlı bu gün Bakı İstintaq Təcridxanasında xüsusi təyinatlı qatardan qaçan məhbuslarla bağlı həbs edilən müğənni Fədayə Laçınla görüşüb. Avtosfer.az xəbər verir ki, T.Süleymanlı APA-ya açıqlamasında deyib ki, F.Laçın saxlanılma şəraitindən narazı deyil: "Onun səhhəti normaldır, heç bir problem yoxdur. Sadəcə, bütün olanlara görə peşmandır. Bildiyiniz kimi, Etibar Məmmədovla münasibəti olub, ancaq ittihamları qəbul etmir".

Xatırladaq ki, oktyabrın 23-də Bakı- Astara - Bakı planlı dəmir yolu qarovulu ilə xüsusi təyinatlı vaqonda Bakı şəhərinə müşayiət olunan 1980-ci il təvəllüdlü, əvvəllər məhkum edilmiş, Cinayət Məcəlləsinin müxtəlif maddələri ilə təqsirləndirilən Etibar Ələkbər oğlu Məmmədov və 1989-cu il təvəllüdlü, əvvəllər məhkum olunmamış, CM-nin müxtəlif maddələri ilə təqsirləndirilən Əli Rasim oğlu Ağami müşayiət altından qaçıblar.

Qaçan məhbuslardan Əli Ağami bir neçə gün sonra Şirvan şəhərində tutulub.

Bir neçə gün əvvəl məhkumların qaçmasına yardım etməkdə təqsirləndirilən 3 nəfər saxlanılıb. Onlar Hacıyev Məhəmməd Famil oğlu, Günay Atakişiyeva və müğənni Fədayə Laçındır. Həmin şəxslər  barəsində həbs qətimkan tədbiri seçilib. Bundan başqa, Pentensiar Xidmətin bir neçə əməkdaşı da həbs olunub.