Yaşıl Kart müqavilələrinin sayı 33% artıb - İyulda

İyul ayında Yaşıl Kart sistemi çərçivəsində fəaliyyət göstərmək hüququ olan sığortaçılar tərəfindən 1 102 beynəlxalq sığorta müqaviləsi bağlanılıb.

İcbari Sığorta Bürosundan Avtosfer.az-a verilən məlumata görə, bu müqavilələrdən 1 042 müqavilə Türkiyə və İrana, 51 müqavilə Yaşıl Kart Sisteminə daxil olan bütün ölkələrə, 9 müqavilə isə Moldova və Ukraynaya səfər edən nəqliyyat vasitələri ilə bağlı olub.

İyul ayında beynəlxalq sığorta müqavilələri üzrə sığorta haqları 65 929 manat təşkil edib.

Yaşıl kart üzrə bağlanılan müqavilələrin 968-i minik, 72-si yük, 45-i qoşqu, 15-i avtobus, 2-si isə motosiklet kateqoriyası üzrə olan nəqliyyat vasitələri ilə bağlı olub.

İyul ayında Yaşıl Kart sistemi çərçivəsində İcbari Sığorta Bürosu tərəfindən Türkiyədə baş vermiş 2 sığorta hadisəsi üzrə ümumilikdə 6 323 manat məbləğində sığorta  ödənişi həyata keçirilib. Cari ilin iyun ayı ilə müqayisədə Yaşıl Kart müqavilələrinin sayında 33% artım müşahidə olunub.