Yol polisi və AYNA Bakı-Sumqayıt yolunda reydlərə başlayır - DİQQƏT

Bu gündən etibarən Bakı-Sumqayıt şəhərlərarası sərnişindaşıma fəaliyyəti ilə məşğul olan sürücülərə qarşı reydlər keçiriləcək.

Avtosfer.az-ın əldə etdiyi məlumata görə, bununla bağlı Nazirlər Kabineti aidiyyatı qurumlara göstəriş verib. Sabahdan etibarən Baş Dövlət Yol Polisi İdarəsi və Azərbaycan Yerüstü Nəqliyyat Agentliyi (AYNA) birgə reydlərə başlayacaq. Reydlərin əsas məqsədi qanunsuz sərnişindaşıma ilə mübarizə aparmaq, sərnişinlərin rahat və təhlükəsiz hərəkətini təmin etmək üçün çıxış yollarını üzə çıxarmaqdır.

Hazırda bu sahədə ciddi problemlər var. Bakı-Sumqayıt marşrutu üzrə cəmi 4 avtobus fəaliyyət göstərir. Nəticədə sərnişinlərin vaxtında mənzil başına çatdırılması mümkün olmur. Belə olduqda qanunsuz sərnişindaşıma ilə məşğul olan mikroavtobuslar xəttə çıxır. Eyni zamanda, manatlıq taksilər də Bakı-Sumqayıt yolunda xaotik vəziyyət yaradır.

Hökümət məsələnin həlli ilə bağlı aidiyyatı qurumlara göstəriş verib. Beləliklə, bu gündən etibarən mütəmadi reydlər keçiriləcək.

Nərminə Əli