Yol polisini işdən qovduran general oğlunun özünü işdən çıxardılar

Müdafiə Nazirliyinin Silahlı Qüvvələri Baş Qərargahının rəisi Nəcməddin Sadıxovun oğlu Vergilər Nazirliyindəki vəzifəsindən azad edilib. Nazirlikdən azvision.az-a verilən xəbərə görə, Vergilər naziri Fazil Məmmədovun əmri ilə Məhəmməd Nəcməddin oğlu Sadıxov nazirin müşaviri vəzifəsindən kənarlaşdırlıb. Bununla da vergilər nazirinin müşavirlərinin sayı 9-dan 8-ə enib. 

Xatırladaq ki, Nəcməddin Sadıxovun oğlu Məhəmməd Sadıxov medianın gündəminə polislə mübahisəsinə görə gəlmişdi. 10 NP 020 dövlət nömrə nişanlı “Range Rover”lə qaydanı pozan Məhəmməd Sadıxovu yol polisi Cavanşir Qasımov saxlasa da, onun polisi təhqir edərək hücum etməsi ilə bağlı məlumat yayılmışdı. Bu qalmaqal isə Cavanşir Qasımovun işdən çıxarılması ilə nəticələnmişdi.