Yol polisləri tərəfindən döyüldüyü deyilən sürücü danışdı - FOTO

Bakıda Yol Patrul Xidməti (YPX) əməkdaşları tərəfindən döyüldüyü deyilən sürücü danışıb. Elşən Mirzəyev Avtosfer.az-ın "Report"a istinadən yaydığı məlumatla bağlı açıqlamasında bildirib ki, onun döyülməsi ilə bağlı yayılan məlumatlar həqiqəti əks etdirmir: "Məni döyməyiblər. Adımdan yayılan məlumat doğru deyil. Mən heç kimə açıqlama verməmişəm. Maşınımın cəriməsi var idi. Yol polisləri gecə yarısı məni saxladılar. Atam təzəlikcə rəhmətə getdiyi üçün biraz əsəbi, qəzəbli idim. Arada anlaşılmazlıq oldu. Polis bölməsinə apardılar. İzahat verəndən sonra buraxdılar. Hazırda Lənkəranda - atamın yas mərasimindəyəm".

Bakı şəhər Dövlət Yol Polisi İdarəsinin bölmə rəisi, polkovnik Vaqif Əsədov da Avtosfer.az-a bildirdi ki, yayılan məlumatların heç bir əsası yoxdur: "Sürücü ilə söhbət etdim. Bildirdi ki, heç kimə şikayət etməyib. Bu cür məlumatlar yayarkən dəqiqləşdirmək lazımdır".

Qeyd edək ki, "Report"un yaydığı məlumata görə, hadisə Xəzər rayonunun Binə qəsəbəsi, "Südçülük sovxoz"u adlandırılan ərazidə baş verib. Belə ki, Bakı-Masallı istiqamətində hərəkət edən 99 DC 866 dövlət qeydiyyat nişanlı "Ford" markalı mikroavtobus yol polisinin "Saxla" əmrinə tabe olaraq hərəkətini dayandırıb. Mikroavtobusun sürücüsü 1985-ci il təvəllüdlü Mirzəyev Elşən Şirinbəy oğlunun dediyinə görə, o, sənədləri yol polisinə təqdim edib. Məlum olub ki, mikroavtobusun sürücüsü üç ay əvvəl 200 manat məbləğində cərimə edilib. Buna görə maşının üzərinə həbs qoyulub. Polis əməkdaşları mikroavtobusu "Cərimə meydançası"na aparmaq istəyib. Buna etiraz edən sürücü E.Mirzəyev ilə Xəzər Rayon Dövlət Yol Polis İdarəsinə (DYPİ) məxsus 99 YP 240 dövlət qeydiyyat nişanlı Yol Patrul Xidmətinin (YPX) xidməti avtomobilində əyləşən polis əməkdaşları arasında mübahisə yaranıb, sonra isə dava düşüb. Nəticədə sürücü E.Mirzəyev döyülərək ağır bədən xəsarətləri alıb. O, 3 saylı Şəhər Klinik Xəstəxanasına yerləşdirilib. E.Mirzəyevə məxsus mikroavtobus isə cərimə meydançasına aparılıb.

Faktla bağlı Xəzər Rayon Polis İdarəsinin (RPİ) 2-ci Polis Bölməsində (PB) araşdırma aparılır.