Yola, suya, işığa həsrət qalan Neftçala kəndləri - VİDEO

Neftçalanın rayon mərkəzindən təxminən 20 km uzaqda yerləşən Mikayıllı, Sarıqamış, Dalğa, Saratski kəndlərinin daxil olduğu Sarıqamış kənd inzibati dairəsi gözdən uzaq, könüldən iraq düşüb. Sakinlər uzun illərdir yol, su, elektrik sarıdan korluq çəkir. Tibb məntəqəsinin olmaması isə başqa bir dərddir. Camaat deyir ki, elektrik dirəkləri elə naqillər kimi köhnəlib sıradan çıxıb. Kəndləri təmin edən elektrik transformatoru isə qəza və təhlükə mənbəyinə çevrilib. Bəs görəsən, yüzlərlə sakinin hər gün üzləşdiyi sosial problemlər nə zaman həllini tapacaq?

Avtosfer.az xəbər verir ki, Baku TV Sarıqamış kənd inzibati dairəsinin problemləri ilə bağlı aidiyyəti qurumların mövqeyini öyrənib.

“Azərsu” ASC-nin mətbuat xidmətinin rəhbəri Anar Cəbrayıllı bildirib ki, adıçəkilən kəndlərin su təchizatının aparılması ilə bağlı bizim layihə təkliflərimiz var və hökumətə təqdim olunub.

Avtomobil Yolları Dövlət Agentliyinin mətbuat xidmətinin rəhbəri Anar Nəcəfli açıqlamasında bildirib ki, Neftçalanın Sarıqamış kəndinə gedən avtomobil yolu da daxil olmaqla, rayon üzrə təmirə ehtiyacı olan digər avtomobil yollarının da siyahısı tərtib olunaraq aidiyyəti üzrə təqdim olunub. Maliyyə vəsaiti ayrıldıqca təmirə ehtiyacı olan yolların yenidən qurulması növbəli şəkildə həyata keçiriləcək.