Yollarda "kontrabas pulu" - Bəs onları kim ödəyəcək?

Respublika yollarında baş verən qəzalar zamanı yol təsərrüfatına dəyən ziyanın yalnız təxminən yarısı ödənilib. Avtosfer.az xəbər verir ki, bu barədə "Azəravtoyol" ASC-dən milli.az-a bildiriblər ki, görülən tədbirlərə baxmayaraq, 2016-cı il ərzində  respublikanın avtomobil yollarında və Bakı şəhər yollarında 653 yol-nəqliyyat hadisəsi baş vermiş, nəticədə 8 911,1 p.m əyrixətli tirlər, 12 ədəd işıq dirəyi, 12 p.m səsboğucu qurğu, 133 metr dəmir-beton sədlər, 60 p.m körpü məhəccəri, 43 p.m istinad divarı və 37 ədəd yol nişanı yararsız hala düşüb. Ümümilikdə yol təsərrüfatına 780,0 min manat məbləğində maddi ziyan dəyib, bundan 416,8 min manat (53,4 %) ödənilib. Dəyən ziyanın qalan hissəsinin ödənilməsi məqsədilə, 443 yol nəqliyyat hadisəsi ilə bağlı müvafiq sığorta şirkətlərinə müraciət olunub, 61 yol nəqliyyat hadisəsi ilə bağlı avtonəqliyyat vasitələrinin sığortası olmadığına görə məhkəmələrə müraciət edilib, 143 yol nəqliyyat hadisəsi törətmiş səbəbkar məlum olmadığı üçün, onların araşdırılaraq tapılması üçün Baş Dövlət Yol Polisi İdarəsinə müraciət ünvanlanıb.