Yollarda tıxac yarandı - DYP sürücü və piyadalara müraciət etdi

Bakı şəhər DYP sürücülərə və avtomobil sahiblərinə müraciət edib. Avtosfer.az-a bu barədə DYP-nin bölmə rəisi, polkovnik Vaqif Əsədov məlumat verib. Bildirib ki, Bakı şəhəri ərazisində yagan güclü qar bəzi yollarda sürüşkən vəziyyət yaradib bu da avtomobillərin hərəkətində tıxacların yaranmasına səbəb olub: "Sürücülərin diqqətinə çatdırırıq ki, sürüşmə ehtimalı yarandığı ücün şəxsi avtomobillərdən az istifadə etsinlər. Hazırda paytaxtın Yasamal, Səbayel, eyni zamanda Nəsimi rayonunun bəzi hündür ərazilərində yollar sürüşkən olduğu üçün sıxlıq yaranıb. 

20 yanvar, 3-cü mikrorayon dairələrində və enişli-yoxuşlu yollarda, sərt döngələrdə vəziyyət daha acınacaqlıdır. 

Bəzi intizamsız sürücülərin hərəkətləri nəticəsində də yollarda sıxlıq müşahidə olunur. 

Hazırda DYP gücləndirilmiş iş rejimində hərəkəti tənzimləməklə sıxlığı aradan qaldırmağa çalışır".

Ona görə də yol polisi sürücülərə avtomobildən yalnız son zərurət yarandıqda istifadə etməyi tövsiyə edir və belə hava şəraitində sürət rejiminin nəzərə alınmasının zəruriliyini diqqətə çatdırır. 

Yol polisi piyadaların da diqqətinə çatdırır ki, nizamlanmayan kecidlərdən istifadə edərkən yaxınlaşmaqda olan nəqliyyat vasitələrinin yoluna çıxmasınlar. Çünki normal hava şəraitinə nisbətən qarlı havada avtomobillərin tormoz məsafəsi bir neçə dəfə artır.

Elməddin