Zəngilana aparan "şüşə kimi" yol: Horadiz - Zəngilan yolundan - VİDEO

İşğaldan azad edilən ərazilərdə yol infrastrukturu yenilənir, köhnə yollar təmir olunur, eyni zamanda təhlükəsizlik tədbirləri də gücləndirilir.

Avtosfer az xəbər verir ki, bir neçə il əvvəl müvəqqəti olaraq Cəbrayıldan Zəngilana qədər olan çəkilən köhnə asfalt yol dağılaraq bərbad vəziyyətə düşmüşdü. Yük maşınlarının intensiv hərəkəti nəticəsində yolda minik avtomobillərinin hərəkəti olduqca çətin və aşağı sürətli idi. Lakin ötən ilin yay aylarında Azərbaycan Avtomobil Yolları Dövlət Agentliyi tərəfindən Cəbrayıldan Zəngilanın Ağalı kəndinə qədər olan dağılmış yol təmir edilib, yolun kənarlarında üzərində işıqqaytarıcı elementləri olan dirəklər basdırıb, müvafiq yol nişanları quraşdırılıb. Hazırda həmin yolda hərəkət daha rahat və təhlükəsizdir.

Qeyd edək ki, Şərqi Zəngəzur iqtisadi rayonuna daxil olan Zəngilan rayonunun ərazisində mövcud Horadiz–Zəngilan avtomobil yolunun əsaslı təmiri işlərinin həyata keçirilməsi ilə bağlı tədbirlər haqqında Azərbaycan Respublikası Prezidentinin Sərəncamına uyğun olaraq Azərbaycan Avtomobil Yolları Dövlət Agentliyi tərəfindən yenidənqurma işlərinə start verilmişdi.

Təmir-tikinti işləri M-6 Hacıqabul-Bəhrəmtəpə-Mincivan-Ermənistan Respublikası ilə dövlət sərhədi avtomobil yolunun (km 173+600 - km 235+000) 61.4 km-lik Horadiz-Zəngilan hissəsində həyata keçirilib.

III texniki dərəcəyə uyğun olaraq əsaslı şəkildə yenidən qurulan yolun torpaq yatağının eni 12 metr təşkil edir. Yolboyu mövcud asfalt-beton örtüyün kənarlaşdırılması, qazma, tökmə işləri, yol yatağının və yol əsasının tikintisi, suların ötürülməsini təmin etmək məqsədilə müxtəlif ölçülü suötürücü boruların inşası, körpülərin təmiri, həmçinin kommunikasiya xətlərinin köçürülməsi işləri aparılıb. 

Xatırladaq ki, bu yol ötən əsrin 80-ci illərində inşa edilib və 30 illik işğal dövründə tamamilə sıradan çıxarılaraq, avtonəqliyat vasitələrinin hərəkəti üçün yararsız olub.

Məhəbbət Tərlanoğlu