238 min verib aldığı gözəllik cihazı başına bəla oldu

Bakıda 140 min dollar ödəyərək bədənşəkilləndirmə cihazları almış qadın dələduzluqla üzləşib.

Avtosfer.az-ın “Qafqazinfo”ya istinadən verdiyi məlumata görə, o, İsraildən tibbi avadanlıqların Azərbaycana gətirilməsi işi ilə məşğul olan sahibkar Vüqar S. tərəfindən aldadılıb.

Belə ki, Vüqar Mətanət adlı iş qadınından 140 min dollar alaraq İsraildən “Venus Bliss” və “Venus Legacy” adlı bədənşəkilləndirmə cihazları sifariş verib. Cihazlar Bakıya gətirildikdən sonra əvvəlcə paytaxtın Yasamal rayonunda yerləşən “Renew” gözəllik mərkəzinə, daha sonra isə “BS Estetik” klinikasına yerləşdirilib. Lakin 2 ay sonra cihazlar koda düşüb və işləməyib.

Məlum olub ki, Vüqar İsraildən gətizdirdiyi cihazların ödənişini tam etməyib və onları kredit şərti ilə idxal edib. İsrail şirkəti də ödənişin edilmədiyini görərək cihazları məsafədən idarəedilən sistem vasitəsilə koda salıb.

Mətanət dəfələrlə əlaqə saxlamaq istəsə də, Vüqara verdiyi pulları geri ala bilməyib. Qadın məsələ ilə bağlı hüquq-mühafizə orqanlarına müraciət edib və cinayət işi başlanılıb.

Vüqar S. Cinayət Məcəlləsinin 178.3.2-ci (Külli miqdarda dələduzluq) maddəsi üzrə açılmış iş üzrə mühakimə edilib. O, cinayət işi ilə əlaqədar bir neçə ay əvvəl həbs edilib.

Fevralın 19-da isə Bakı Ağır Cinayətlər Məhkəməsi işlə bağlı hökmü elan edib. Tərəflərin artıq aralarında razılaşması nəzərə alınaraq Vüqara şərti cəza verilib və o, məhkəmə zalından azadlığa buraxılıb.