ADMİU-da birinci kurs tələbələrinə qarşı zorakılıq: Rəhbərlik hərəkətə keçdi – VİDEO - YENİLƏNİB

DİN-in Mətbuat Xidmətinin əməkdaşı Lumu İsrəfilli Avtosfer.az-a açıqlamasında bildirib ki, bununla bağlı araşdırma aparılıb. Sosial şəbəkədə yayılan görüntülərdə adı keçən şəxslər Yasamal RPİ-yə dəvət olunub. Onlarla profilaktik söhbətlər aparılıb və barələrində İnzibati Xətalar Məcəlləsinin müvafiq maddəsi ilə inzibati protokollar tərtib edilib. Həmçinin gələcəkdə bu kimi hallara yol verməmələri barədə xəbərdarlıq olunub.

***

“TikTok” sosial şəbəkəsində canlı yayım açan iki nəfər Azərbaycan Dövlət Mədəniyyət və İncəsənət Universitetinin tələbələri olduqlarını bildirərək universitetin aşağı kurs tələbələri ilə bağlı zorakı davranışlardan danışıblar.

Avtosfer.az xəbər verir ki, “leylakenan” adlı “TikTok” hesabından canlı yayım zamanı Azərbaycan Dövlət Mədəniyyət və İncəsənət Universitetinin birinci kursunda təhsil alan tələbələrə qarşı təhqiramiz və aşağılayıcı ifadələr səsləndirilib. Canlı yayımda danışan şəxslər həmin universitetdə təhsil aldıqlarını bildiriblər.

Məsələ ilə bağlı Azərbaycan Dövlət Mədəniyyət və İncəsənət Universitetindən Avtosfer.az-a verilən açıqlamada bildirilib ki, görüntülərdə adı keçən tələbələr rəhbərlik tərəfindən çağırılıb.

Qeyd olunub ki, məsələ ilə bağlı araşdırma aparılacaq və həmin tələbələrin davranışları ilə bağlı lazımi tədbirlər görüləcək. 

DİN Mətbuat Xidmətinin əməkdaşı Lumu İsrəfilli bildirib ki, məlumatlıyıq, araşdırma aparılır.

Eltac Zülfüqaroğlu