Ağdamda 12 min manatlıq pensiya dələduzluğu

Pensiya dələduzluğu ilə bağlı daha bir cinayət işinin məhkəmə istintaqı yekunlaşıb.  Avtosfer.az-ın "Qaynarinfo"ya istinadən məlumatına görə, dələduzluq Ağdam rayonunda baş verib. Cinayət işində zərərçəkmişlərin əsas şikayətçi olduğu Yasən adlı şəxsdir. Lakin o bu əməli tək törətməyib. Yasən bu işdə Tofiq adlı şəxsin əsas adam olduğunu bildirib. Hətta ondan polisə də şikayət edib.  Cinayət işi üzrə 6 nəfər zərərçəkmiş var. Onlar ifadələrində pensiya üçün Yasənə pul verdiyini bildiriblər. Dəymiş zərərin ümumi məbləği 12 000 manatdır. Hər iki şəxs zərərçəkmişlərin şikayəti əsasında saxlanılıb. Onlara Cinayət Məcəlləsinin 178.2.1 və 178.2.2-ci maddələri ilə ittiham elan edilib. Cinayət işinə Ağdam Rayon Məhkəməsində baxılıb.  Məhkəmə zamanı məlum olub ki, Yasən dəymiş zərəri və dövlət büdcəsinə zərərin 25 faizini ödəyib. Bu baxımdan, o, cinayət məsuliyyətindən azad edilib. Digər təqsirləndirilən şəxs isə 1 il 6 ay müddətinə azadlığın məhdudlaşdırılması cəzasına məhkum edilib.