Arvadını bıçaqlayan qısqanc kişiyə hökm oxundu

Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Habil Nəsirovun (şərti) cinayət işi üzrə məhkəmə istintaqı başa çatıb.

Avtosfer.az Konkret.az-a istinadən xəbər verir ki, hakim Mahirə Kərimovanın sədrliyi ilə keçirilən prosesdə hökm oxunub.

Məhkəmənin hökmü ilə o, 3 il müddətinə azadlıqdan məhrum edilib.

İttihama görə, hadisə 04 may 2024-cü il tarixdə, saat 21 radələrində paytaxtın Suraxanı rayonu ərazisində qeydə alınıb.

Belə ki, Habil Nəsirov birgə yaşadıqları evdə arvadı, zərərçəkmiş Rəna Nəsirovanın (şərti) başqa kişilərlə ünsiyyətdə olmaqla ona xəyanət etməsindən şübhələnib. O, buna görə həyat yoldaşı ilə şəxsi münasibətlər və qısqanclıq zəminində mübahisə edib. Sonra Habil arvadına bıçaqla qəsdən bir neçə dəfə zərbə endirərək ona xəsarət yetirib.

Hadisədən sonra Habil Nəsirov saxlanılıb və barəsində həbs qətimkan tədbiri seçilib.