Avtomobil bir qrup insanı vurdu - 8 nəfər xəsarət alıb

Polşanın paytaxtı Varşavanın şərqində avtomobil məktəb hasarı yanında bir qrup insanı vurub, bir neçə nəfər xəsarət alıb.

Avtosfer.az “Report”a istinadən xəbər verir ki, bu barədə TVN24 telekanalına polis nümayəndəsi Bartolomey Şnyadala bildirib.

“Hadisə yerində polis tərəfindən əldə edilən ilkin məlumatlara görə, “Kia” markalı minik avtomobilinin sürücüsü məktəbin qarşısındakı dayanacaqda dayanan iki uşağı və bir kişini vurub”, – Şnyadala deyib.

Onun sözlərinə görə, sürücü ayıq olub, hadisə saat 16:00 radələrində Varşavanın şərqindəki Vesola rayonunda yerləşən ibtidai məktəbin yanında baş verib.

Daha sonra Dövlət Yanğın Xidmətinin nümayəndəsi Patrik Topolski “TVN Warszawa” telekanalına müsahibəsində hadisə sonucunda səkkiz nəfərin xəsarət aldığını vurğulayıb.

“Minik avtomobilini idarə edən şəxs hasara çırpılıb və nəticədə səkkiz nəfər xəsarət alıb. Xəsarət alanlardan altısı uşaq, ikisi böyükdür”, – o qeyd edib.