Avtomobilin üzərində qan izləri görüb polisə xəbər verdilər, ortaya qoyun çıxdı

Antalyanın Manavgat rayonunda qeyri-adi hadisə baş verib.

Avtosfer.az türk mediasına istinadən xəbər verir ki, bir vətəndaş, ağ rəngli avtomobilin hər tərəfində qan izləri görərək vəziyyəti yol polisə bildirib.

Hadisə Çağlayan ibtidai məktəbinin yaxınlığında baş verib. Məktəbin qarşısında növbədə olan yol polisi, avtomobilin arxa nömrə nişanında və ön sol hissəsində qan ləkələri olduğunu görüb və dərhal Trafik Bürosu ilə əlaqə saxlayaraq avtomobil sahibinin tapılmasını istəyib.

Qısa müddət sonra hadisə yerinə gələn qadın sürücü, avtomobili yeni aldığını və ənənələrə uyğun olaraq kəsilən qurbanın qanını avtomobilin bəzi hissələrinə sürdüyünü bildirib.

Qadının izahından sonra hadisənin təhlükəli vəziyyətlə bağlı olmadığı müəyyənləşdirilib və polis əməkdaşı ərazidən ayrılaraq vəzifəsinin icrasına davam edib.

Hadisə sosial mediada da maraq doğurub və bir çox istifadəçi bunu "ənənə və müasirliyin qəribə qarşılaşması" kimi dəyərləndirib.(Sonxeber)