Bacısı oğlunu öldürən çobanın ibtidai istintaqı yekunlaşdı

Ağcabədidə qətl törətməkdə təqsirləndirilən Natiq Babayevin cinayət işi üzrə ibtidai istintaq yekunlaşıb. Avtosfer.az-ın Pravda.az-a istinadən məlumata görə, toplanan iş baxılması üçün Lənkəran Ağır Cinayətlər Məhkəməsinə göndərilib.

Cinayət işi hakim Cavid Səfərlinin icraatına verilib.

Hadisə bu il iyunun 9-da saat 16 radələrində Ağcabədi rayonunun Pərioğullar kəndində qeydə alınıb. Fermada çoban işləyən 39 yaşlı Babayev Natiq Mayıl oğlu otlaq sahəsində bacısı oğlu 7 yaşlı Əhmədov Anar Yasin oğlunun başına ağacla bir neçə dəfə zərbə vurub.

Azyaşlı aldığı xəsarətlərdən ölüb.

Faktla bağlı Ağcabədi rayon prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma, ölümə səbəb olduqda) maddəsi ilə cinayət işi başlanıb.