Bakıda yol verməmək üstündə sürücünü bıçaqlayan şəxsə AĞIR CƏZA

Bakı Ağır Cinayətlər Məhkəməsində qəsdən sağlamlığa ağır zərərvurmada və xuliqanlıqda təqsirləndirilən Sərxan Sərxanovun (adı, soyadı şərtidir) cinayət işi üzrə məhkəmə istintaqı başa çatıb.

Avtosfer.az Pravda.az-a istinadla xəbər verir ki, hakim Azər Tağıyevin sədrliyi ilə keçirilən prosesdə hökm oxunub.

Məhkəmənin hökmü ilə Sərxan Sərxanova 8 il 6 ay müddətinə azadlıqdan məhrumetmə cəzası təyin edilib.

İttihama görə, hadisə bu il Bakı şəhəri, Binəqədi rayonu, Binəqədi qəsəbəsi, 2-ci Mədən küçəsində qeydə alınıb.

Belə ki, Sərxan Sərxanov idarə etdiyi "Hyundai Santa Fe" avtomobili ilə hərəkət edərkən VAZ-21074 markalı avtomobilin sürücüsü, zərərçəkmiş Taryel Kərimovun (adı, soyadı şərtidir) maşınını saxladaraq irad bildirərək onunla söhbət etməyə başlayıb. Bu zaman hər iki şəxs arasında yol verməmək üstündə mübahisə başlayıb. Nəticədə Sərxan cib bıçağı ilə zərərçəkmiş şəxsin qarın nahiyəsindən qəsdən bir dəfə vuraraq, ona bədən xəsarəti yetirib.

Hadisədən sonra Sərxan Sərxanov saxlanılaraq cinayət məsuliyyətinə cəlb edilib.