Biləsuvarda avtomobilin vurduğu piyada xəstəxanada öldü - FOTO - YENİLƏNİB

Biləsuvarda baş verən qəzada ağır xəsarət alan piyada ölüb.

Avtosfer.az apa-ya istinadən xəbər verir ki, bir neçə gün bundan əvvəl Biləsuvar-Bəhrəmtəpə magistral yolunun Nəsimikənd kəndi ərazisində baş verən yol-nəqliyyat hadisəsində ağır xəsarət alan piyada bu gün ölüb.

Belə ki, aprelin 7-də günorta saatlarında hərəkətdə olan “Mercedes” markalı mikroavtobusun sürücüsü, Bəydili kənd sakini Tofiq Əliyev qəfil yolun ortasına çıxan iribuynuzlu heyvandan yayınmağa çalışıb. Nəticədə nəqliyyat vasitəsini yolun sağ tərəfinə yönəldən sürücü, həmin an kənarda telefonla danışaraq hərəkət edən piyada 2005-ci il təvəllüdlü Rəşad Rauf oğlu Əkbərovu vurub.

Qəza nəticəsində ağır kəllə-beyin travması alan R.Əkbərov dərhal Biləsuvar Rayon Mərkəzi Xəstəxanasına çatdırılıb. O, bir neçə gün həkimlərin nəzarəti altında reanimasiya şöbəsində saxlanılıb.

Buna baxmayaraq R.Əkbərovun həyatını xilas etmək mümkün olmayıb.

Faktla bağlı araşdırma aparılır.

***

Biləsuvarda mikroavtobus piyadanı vurub.

Avtosfer.az apa-ya istinadən xəbər verir ki, hadisə Biləsuavar-Bəhrəmtəpə avtomol yolunda, Nəsimi kəndi ərazisində qeydə alınıb.

Biləsuvar rayonunun Bəydili kənd sakini Tofiq Əliyevin idarə etdiyi "Mercedes" markalı mikroavtobus kənd sakini 2005-ci il təvəllüdlü Rəşad Əkbərovu vurub. Müxtəlif dərəcəli xəsarətlər alan piyada sürücü tərəfindən xəstəxanaya çatdırılıb. O, reanimasiyaya yerləşdirilib.

Məlumata görə, R.Əkbərov bir neçə gün öncə hərbi xidmətdən geri dönüb.

Faktla bağlı araşdırma aparılır.