Bu qəsəbədə sürücülər asfaltsız yoldan, piyadalar səkisizlikdən əziyyət çəkir - VİDEO

Salyan rayonunun Stansiya qəsəbəsində yolun vəziyyəti narazılığa səbəb olub.

Avtosfer.az-ın məlumatına görə, izləyicilərdən biri bununla bağlı redaksiyanın “WhatsApp” ünvanına videomaterial göndərib.

Kadrlardan görünür ki, yolun asfalt örtüyü yoxdur və səthində çoxsaylı nahamarlıqlar yaranıb. Bu isə ərazidə avtomobillərin hərəkətini çətinləşdirir. Sürücülər nəqliyyat vasitələrini aşağı sürətlə idarə etmək məcburiyyətində qalırlar.

Şikayətçinin sözlərinə görə, qəsəbədə təkcə yolun vəziyyəti deyil, piyadaların hərəkəti üçün şəraitin olmaması da ciddi problemdir. Belə ki, ərazidə səkilər də yoxdur.

O bildirib ki, yaxınlıqda məktəb və xəstəxana fəaliyyət göstərməsinə baxmayaraq, yolun və piyada infrastrukturunun vəziyyəti ürəkaçan deyil. Bu da həmin ərazidən istifadə edən sürücülər və piyadalar üçün əlavə çətinliklər yaradır.

Nərmin