Ceyranbatanda atları döyüb öldürüblər – VƏTƏNDAŞ ŞİKAYƏTİ- VİDEO

Abşeron rayonu Ceyranbatan qəsəbəsində yayılan görüntülər sosial şəbəkələrdə ciddi narazılıq doğurub.

Avtosfer.az xəbər verir ki, hadisənin Yeni Saray adlanan ərazidə baş verdiyi bildirilir. Şahidlərin sözlərinə görə, atlara qarşı qəddar rəftar edildiyi iddia olunur. Yayılan videolarda heyvanların ağır vəziyyətdə olduğu, bəzi atların göz nahiyəsindən qan izlərinin müşahidə edildiyi qeyd edilir.

Sakinlər bildirirlər ki, ərazidə atların saxlanma şəraiti qənaətbəxş deyil və onlara qarşı zorakılıq halları baş verir. İddialara görə, bəzi heyvanlar tələf olduqdan sonra da ərazidə açıq şəkildə saxlanılır.

Məsələ sosial şəbəkə istifadəçiləri tərəfindən kəskin tənqid olunub və aidiyyəti qurumların hadisəyə müdaxilə etməsi tələb edilib.

Qeyd edək ki, heyvanlara qarşı qəddar rəftar Azərbaycan qanunvericiliyi ilə qadağandır və bu cür hallara görə məsuliyyət nəzərdə tutulur. Hadisə ilə bağlı rəsmi qurumların mövqeyi hələlik açıqlanmayıb.

Eltac Zülfüqaroğlu