Dörd övladına aliment verməyən ana cəzalandırıldı

Azərbaycanda övladlarına aliment verməyən ana cəzalandırılıb.

Avtosfer.az "Qafqazinfo"ya istinadən xəbər verir ki, qadın məhkəmə qərarını icra etməməkdə təqsirli bilinib.

Afət Quliyevanın (ad-soyad şərti) dörd övladına aliment ödəməməsi ilə bağlı keçmiş əri şikayətçi olub. Üçüncü qrup əlil olan ər uşaqlarının xərclərini qarşılamaq üçün alimentin ödənilməsini tələb edib.

Məhkəmənin qərarına əsasən, A.Quliyeva hər uşaq üçün aylıq 50 manat aliment ödəməlidir. Çünki o, uşaqlarını atanın yanında qoyaraq ailəni tərk etdiyinə görə məsuliyyət daşıyır. Qadın uşaqlarına aliment vermədiyi üçün daha əvvəl də iki dəfə cəzalandırılıb. Hazırda ödənilməmiş ümumi aliment borcu altı min manatdır.

Məhkəmədə məlum olub ki, A.Quliyeva yenidən ailə həyatı qurub və Abşeron rayonunda gözəllik salonunda işləyir. Keçmiş əri qadının qanunauyğun şəkildə cəzalandırılmasını xahiş edib. O, aylıq 400 manat maaş aldığını da məhkəmənin diqqətinə çatdırıb.

Göyçay Rayon Məhkəməsinin qərarı ilə anaya bir il müddətinə azadlığın məhdudlaşdırılması (elektron qolbaq) cəzası verilib.