Gəncədə sinif rəhbəri şagirdi döyüb? - AÇIQLAMA - FOTO

Gəncədə sinif rəhbəri 5-ci sinif şagirdini döyüb.

Avtosfer.az xəbər verir ki, bu iddia ilə “Qafqazinfo”ya azyaşlının babası Ələddin Hüseynov müraciət edib.

Onun sözlərinə görə, hadisə Samir Vəliyev adına 34 nömrəli tam orta məktəbdə baş verib. Ə. H.-nin sinif rəhbəri, Cavid adlı müəllim tərəfindən döyüldüyü deyilir: 

“Bu, ilk hadisə deyil, daha öncə də nəvəm həmin müəllim tərəfindən döyülüb. Tualetdə “niyə direktora demisən?” söyləyərək uşağı bir daha döyüb. Başını bir neçə dəfə divara çırpıb. Uşaq əli üstə yerə yıxılıb və əzilib. Hazırda əlinə sarğı qoyulub. Bütün gecəni başının ağrısından dayana bilməyib. Səhəri gün məktəbə getdik, müəllimdən uşağı niyə vurmasının səbəbini soruşduq. Kollektivin qarşısında bizə “vurmuşam, yaxşı eləmişəm” dedi”.

Ə. Hüseynovun sözlərinə görə, nəvəsi insidentdən sonra məktəbə getməyib. Baş verən halla bağlı polisə məlumat verilib.

Sadalanan ittihamlarla bağlı Gəncə-Daşkəsən Regional Təhsil İdarəsinə müraciət etdik. Qurumdan sorğumuza cavab olaraq bildirildi ki, faktla bağlı araşdırma aparılıb: 

“34 nömrəli məktəbdə müəllimin şagirdə qarşı uyğunsuz davranışı iddiası ilə bağlı vətəndaş müraciəti edilib. Müraciət əsasında həm Gəncə-Daşkəsən Regional Təhsil İdarəsi, həm də hüquq-mühafizə orqanları tərəfindən araşdırma aparılır. Araşdırmanın nəticələri barədə ictimaiyyətə məlumat veriləcək”.