Gənclərin öldüyü partlayışa görə ev sahibi cəzalandırıldı

Sabunçu rayonunda məcburi köçkünlərin məskunlaşdığı binada 2 nəfərin ölümü ilə nəticələnən partlayışla bağlı açılmış cinayət işi üzrə məhkəmə prosesi başa çatıb.

Avtosfer.az xəbər verir ki, hadisə ilə bağlı partlayış baş verən mənzilin sahibi Rima Ağalarova cəzalandırılıb.

Səhlənkarlığa yol verən mənzil sahibinə qarşı Cinayət Məcəlləsinin 225.3-cü (yanğın təhlükəsizliyi qaydalarını pozma-ehtiyatsızlıqdan iki və daha çox şəxsin ölümünə səbəb olduqda) maddəsi ilə ittiham irəli sürülüb.

O, cəzasını məntəqə tipli müəssisədə çəkməklə 5 il müddətinə azadlıqdan məhrum edilib.

Bildirilib ki, partlayışa R.Ağalarovanın kirayə verdiyi evdə qaz xəttinin açıq olması səbəb olub. Qaz kranının kim tərəfindən açıq saxlanması isə müəyyənləşməyib.

Həmçinin qeyd edilib ki, partlayış nəticəsində bina sakinlərinə ümumilikdə 160 min manatdan artıq ziyan dəyib.

Qeyd edək ki, hadisə 2023-cü ilin mayında Sabunçu rayonunun Bakıxanov qəsəbəsində qeydə alınıb. Qaz sızmasından baş verən partlayış zamanı kirayəşin 26 yaşlı Elnur Əsgərov və 23 yaşlı İlahə Qarayeva ölmüş, bir neçə nəfər xəsarət almışdı.(qafqazinfo)