İşıqforun qarşısını kəsən ağaclar qəzaya və cəriməyə səbəb olur - VİDEO

Yasamal rayonunda yerləşən tibb müəssisələrindən birinin qarşısında sürücüləri narahat edən ciddi problem yaşanır. 
Bu barədə Avtosfer.az-a müraciət edən avtomobil idarəçilərindən biri bildirib ki, Əsəd Əhmədov küçəsində işıqfor var, lakin ağacların sıx budaqları səbəbilə işıqforu vaxtında görmək mümkün olmur.
Bu isə sürücülərin hərəkət zamanı çaşqınlıq yaşamasına və ehtiyatsızlıq nəticəsində yol hərəkəti qaydalarını pozmasına səbəb olur.
Sürücünün sözlərinə görə, sağa və sola yol ayrıcı olan bu hissədə işıqforun vaxtında görünməməsi sürücüləri qəfil dayanmağa və ya hərəkəti davam etdirməyə məcbur edir. Nəticədə həm təhlükəli vəziyyət yaranır, həm də işıqforun yandığını yalnız yaxınlaşdıqdan sonra görmək mümkündür.
İşıqforla bağlı yaranan vəziyyət ya hansısa qəza hadisəsinə, ya da yersiz cəriməyə səbəb ola bilər. Nəqliyyat vasitəsi idarəçiləri aidiyyəti qurumlardan məsələnin həll edilməsini xahiş edir.

Fidan