Kafedə taksi sürücüsü dava saldı, cərimə olundu

Abşeron rayonunda kafelərdən birində dava olub. Avtosfer.az-ın "Teleqraf"a istinadən xəbərinə görə, hadisə aprelin 28-də Abşeronun Pirəkəşkül qəsəbəsində baş verib.

Qəbələ rayon sakini, 1995-ci il təvəllüdlü Bəhram Məlikov (ad-soyad şərti verilib – red.) qəsəbədə olan kafelərdən birində ictimai qaydanı pozub, səs-küy salıb, ünvansız nalayiq ifadələr işlədib.

Onun barəsində İnzibati Xətalar Məcəlləsinin 510-ci (xırda xuliqanlıq) maddəsi ilə ittiham elan edilib.

İş üzrə izahat verən B.Məlikov bildirib ki, hadisəyə səbəb ona pul borcu olan dostu ilə telefonda mübahisə etməsi olub: “Dostumla telefonda danışarkən borcunu ödəməsini tələb etsəm də, dediklərimə əhəmiyyət vermədi. Beləcə əsəbləşərək, ona qarşı qeyri-etik sözlər dedim. Ətrafdakıların narahatlığına səbəb olan hərəkətlər elədim”.

B.Məlikov ifadəsində əməlindən peşman olduğunu, əvvəllər inzibati məsuliyyətə cəlb edilmədiyini bildirib. Qeyd edib ki, ailəsinin dolanışığını təmin etmək üçün taksi fəaliyyəti ilə məşğul olur. Himayəsində azyaşlı uşağın olduğunu da göstərib.

Abşeron Rayon Məhkəməsinin qərarı ilə B.Məlikov 50 manat miqdarında cərimə olunub.