Keçmiş arvadına 11 bıçaq zərbəsi vuran şəxsə AĞIR CƏZA

Lənkəran Ağır Cinayətlər Məhkəməsində xüsusi amansızlıqla adam öldürməyə cəhddə təqsirləndirilən Rüstəm Yusifovun (soyadı şərtidir) cinayət işi üzrə məhkəmə iclası başa çatıb.

Avtosfer.az Pravda.az-a istinadən xəbər verir ki, hakim Cavanşir Nəbiyevin sədrliyi ilə keçirilən prosesdə hökm oxunub.

Məhkəmənin hökmü ilə R.Yusifov 11 il 3 ay müddətinə azadlıqdan məhrum edilib.

İttihama görə, hadisə 2024-cü il noyabrın 1-də, saat 8 radələrində Ağcabədi şəhəri, İsmət Qayıbov küçəsində qeydə alınıb.

Belə ki, Rüstəm Yusifov keçmiş arvadı, zərərçəkmiş Sara Məmmədova (soyadı şərtidir) ilə mübahisə edib. Bu zaman o, üzərində gəzdirdiyi mətbəx bıçağı ilə qadına ümumilikdə 11 zərbə endirərək bədən xəsarətləri yetirib. Hadisə yerinə onların övladları gəliblər və ətrafda olan şəxslər Rüstəmi ayırıblar. Xəstəxanaya çatdıran Saranın həyatını xilas etmək mümkün olub.

Hadisədən sonra Rüstəm Yusifov saxlanılaraq cinayət məsuliyyətinə cəlb edilib.