Keçmiş ər arvadının 1,6 milyonluq maşınını oğurladı: Cinayət işi açıldı – FOTOLAR

Keçmiş ər arvadının 1,6 milyon rubl dəyərində olan maşınını oğurlayıb. Avtosfer.az xəbər verir ki, hadisə Rusiyanın Krasnoyarsk diyarında baş verib.

Belə ki, yerli sakin evinin qarşısında saxlanılmış avtomobilinin yoxa çıxması ilə bağlı polisə müraciət edib. Bundan sonra cinayət-axtarış əməkdaşları əməliyyata başlayıblar. Araşdırmalar nəticəsində nəqliyyat vasitəsinin oğurlanmasında zərərçəkənin 48 yaşlı keçmiş əri şübhəli bilinib.

Məlum olub ki, boşanma prosesindən sonra 1,6 milyon rubl dəyərində olan “Mazda” markalı avtomobilə mülkiyyət hüququ rəsmi olaraq qadına keçib. Lakin bu qərarla razılaşmayan kişi ehtiyat açardan istifadə edərək maşını dayanacaqdan götürüb və şəhər kənarında icarəyə götürdüyü qarajda gizlədib.

Polis əməkdaşları tərəfindən tapılan avtomobil müsadirə olunaraq sahibinə qaytarılıb. Faktla bağlı şübhəli şəxsə qarşı cinayət işi açılıb. Keçmiş əri 10 ilədək azadlıqdan məhrumetmə cəzası gözləyir.

Namiq Musayev