Maşının altında ölkəyə gəldi - HƏBS EDİLDİ

Azərbaycana qanunsuz yolla qayıdan vətəndaş həbs edilib.

Avtosfer.az Modern.az-a istinadla xəbər verir ki, təqsirləndirilən şəxs 2023-cü ildə rəsmi qaydada Azərbaycanı tərk edərək Türkiyəyə gedib.

O, sənədləri itirdiyinə görə orada 7 ay həbs cəzası alıb. Cəza müddətini başa vurduqdan sonra Azərbaycan Respublikasına qayıtmaq istəsə də, pasportu və digər rəsmi sənədləri olmadığı üçün bu mümkün olmayıb.

Qars şəhərindəki Azərbaycanın konsulluğuna müraciəti nəticəsiz qalan vətəndaş daha sonra qeyri-qanuni yollarla ölkəyə qayıtmaq qərarına gəlib. 27 sentyabr 2024-cü il tarixində, saat 03:00 radələrində İran İslam Respublikasının Biləsuvar şəhərindən Azərbaycana gələn yük nəqliyyat vasitəsinin altına gizlənərək sərhədi keçib. O, Biləsuvar sərhəd-keçid məntəqəsinin yaxınlığında Dövlət Sərhəd Xidmətinin əməkdaşları tərəfindən saxlanılıb.

Məhkəmənin qərarına əsasən, şəxs Cinayət Məcəlləsinin 318.1-ci maddəsi (dövlət sərhədini qanunsuz keçmə) ilə təqsirli bilinərək məsuliyyətə cəlb olunub və 8 ay həbs edilib.