Məktəbə getmək adı ilə evdən çıxan QIZ KÜRDƏ BOĞULDU – TƏFƏRRÜAT – FOTO

Xəbər verdiyimiz kimi, bu gün səhər saatlarında Kür çayının Zərdab rayonu, Əlvənd kəndindən keçən hissəsində 1 nəfər batıb.

Avtosfer.az “Bizim.Media”ya istinadən xəbər verir ki, həmin şəxs 13 yaşlı yeniyetmə Saray Kərimlidir.

Belə ki, 8-ci sinif şagirdi olan Saray Kərimli səhər məktəbə getmək adı ilə evdən çıxıb.

Sonradan isə onun Kür çayında batdığı bildirilib.

Hadisə yerinə FHN-nin Aran Regional dalğıc-axtarış qrupunun əməkdaşları cəlb olunub və hazırda yeniyetmənin tapılması istiqamətində zəruri işləri həyata keçirirlər.

Uşağın atası Sarvan Kərimov Bizim.Media-nın Aran bürosuna açıqlamasında Bakıda işlədiyini bildirib:

“Mənə səhər məktəbdən zəng edib dedilər ki, uşaq məktəbə gəlməyib. Sonradan müəllimləri axtarıblar, gəlib Kürün kənarında onun çantasını tapıblar. Saray sakit uşaq idi, nadinc deyildi. Axşam danışmışdım, hər şey qaydasında idi. Səhər nənəsinə deyib ki, üşüyürəm məktəbə getmək istəmirəm. Qardaşı deyir ki, ayaqqabımı bağlayırdım, gördüm bacım yoxdu gedib. Elə bildim məktəbə gedib, amma məktəbə çatanda gördüm ki, məktəbdə deyil”.

Qeyd edək ki, Sarayın anası atasından ayrılıb və o atası ilə birlikdə yaşayırdı. Onlar ailədə bir bacı və bir qardaş olublar. Hadisənin hansı şəraitdə baş verməsi hələlik məlum deyil.

Hazırda faktla bağlı Zərdab rayon prokurorluğunda araşdırmalara başlanılıb.