Motosikletlə sərxoş kişinin üstündən keçdi, 5 il 6 ay cəza aldı

Saatlıda ölümlə nəticələnən yol-nəqliyyat hadisəsi törətməkdə təqsirləndirilən Niyaməddin İsgəndərova hökm oxunub.

Avtosfer.az xəbər verir ki, e.huquq.az-ın əldə etdiyi məlumata görə, Lənkəıran Ağır Cinayətlər Məhkəməsində hakim Xamməd Nuriyevin sədrliyi ilə keçirilən prosesdə N.İsgəndərov Cinayət Məcəlləsinin 263-1.3 və 264-cü maddələri ilə təqsirli bilinərək 5 il 6 ay müddətə azadlıqdan məhrum edilib.

Qeyd edək ki, hadisə mart ayında Hacıqabul-Bəhrəptəpə-Mincivan avtomobil yolunun Saatlı rayonu Qırağlı kəndi ərazisində qeydə alınıb. Belə ki,  1976-cı il təvəllüdlü N.İsgəndərov nəqliyyat vasitələrini idarə etmək hüququ və etibarnaməsi olmadan idarə etdiyi "Dnepr-11" markalı motosiklet ilə yolun hərəkət hissəsində sərxoş vəziyyətdə uzanmış 1974-cü il təvəllüdlü Əliyev Ədalət Bəykişi oğlunun üzərindən keçib. Sürücü zərərçəkmişə ilkin tibbi yardım göstərilməsi üçün mümkün olan tədbirləri görmədən və hadisə haqqında müvafiq icra hakimiyyəti orqanına xəbər vermədən yol-nəqliyyat hadisəsi yerindən qaçıb. Ə.Əliyev isə aldığı xəsarətlərdən xəstəxanada ölüb.