Piratlar tankerin azad edilməsi üçün 10 milyon tələb edirlər

"Eureka" tankerini ələ keçirən Somali piratları onun azad edilməsi üçün 10 milyon dollar tələb edirlər.

Avtosfer.az "Report"a istinadən xəbər verir ki, bu barədə "Shabelle Media Network" portalı məlumat yayıb.

Qeyd olunub ki, Toqo bayrağı altında üzən gəmi mayın 2-də Ədən körfəzində BƏƏ-dən dizel yanacağı daşıyarkən ələ keçirilib.

Daha əvvəl bildirilmişdi ki, dəniz quldurları onların azad edilməsi ilə bağlı danışıqların iflasa uğraması fonunda tankerin Misir və Hindistan vətəndaşlarından ibarət heyət üzvlərini öldürməklə hədələyiblər.

Britaniyanın dəniz təhlükəsizliyi sahəsində fəaliyyət göstərən "Ambrey" şirkətinin məlumatına görə, hazırda dəniz quldurlarının nəzarətində ən azı iki tanker və bir quru yük gəmisi var.