Piyadalar yola atıldı, sürücü son anda təhlükədən yayındı - VİDEO

Paytaxtın Babək prospektində yol hərəkəti qaydalarını pozan piyadalar kameraya düşüb.

Avtosfer.az-ın məlumatına görə, hadisə avqustun 25-də axşam saatlarında qeydə alınıb. Kadrlardan görünür ki, bir qrup piyada yolu müəyyən olunmayan yerdən keçib. Onlar hərəkətdə olan nəqliyyat vasitələrinə məhəl qoymadan yola çıxaraq yaxınlaşan motosiklet üçün qəza təhlükəsi yaradıblar.

Təhlükəni görən motosiklet sürücüsü siqnal verərək piyadalara xəbərdarlıq edib. Daha sonra geri dönərək onların bu hərəkətinə iradını bildirib. Lakin piyadalardan biri əl hərəkəti ilə sürücüyə əhəmiyyət vermədiyini nümayiş etdirərək törətdiyi qayda pozuntusuna haqq qazandırmağa çalışıb.

Xatırladaq ki, piyadalar yolu yalnız müəyyən edilmiş keçidlərdən, keçid olmadıqda isə yolun təhlükəsizliyinə əmin olduqdan sonra keçməlidirlər. Hərəkətdə olan nəqliyyat vasitəsinin qarşısına qəfil çıxmaq isə həm piyadanın, həm də digər hərəkət iştirakçılarının həyatını real təhlükə qarşısında qoyur. Bu cür məsuliyyətsiz davranış ağır qəza ilə nəticələnə bilər.

Nərmin